Хүн бүр өөр өөрийн гэсэн өвөрмөц зан чанартай, бас өөр өөр ааш араншинтай. Хүүхэд ч ялгаагүй, эхээс төрж өсч өндийхийн хэрээр өөрийн гэсэн өвөрмөц араншин, зан чанартай болон төлөвшиж эхэлдэг. Гэхдээ эцэг эх нь хүүхдээ ямар ааш араншин, зан чанартай хүн болгохыг нь зааж сургаж чадахгүй. Учир нь тухайн хүүхдийн зан чанар, ааш араншин нь эхээс төрөхөд нь хамт заяасан байдаг.
Харин бие хүн болж төлөвшихөд нь эцэг эх нь тусалж болно. Хүүхдийн зан төлөвт хамгийн их нөлөө үзүүлдэг зүйл бол амьдарч буй орчин юм. Бүр тодруулбал өөрийг нь хүрээлж буй эргэн тойрны байдал, хамт амьдардаг хүмүүсийнх нь амьдралын хэв маяг, ааш араншин, зан чанар, элдэв янзын зуршлууд, хэлж ярьж буй үг яриа, зааж сургаж буй зүйлс, хийж буй үйлдлүүд нь хамгийн ихээр нөлөөлдөг. Зарим хүүхэд яг тийм арга барилыг хуулбарлан өсдөг. Тиймээс хүүхдийг өсөж өндийхийн хэрээр төлөвшилд нь сайтар анхаарах нь чухал. Хүүхдийг багаас нь ахмад хүмүүсийг хүндэлж, тэдний үгийг сонсдог болгох нь хүмүүжлийн хамгийн чухал алхам юм. Хүний үгийг анхааралтай сонсож, өөртөө тусгаж чаддаг бол амьдралдаа тохиолдох ямар ч асуудалд тулгамдахгүй, барьц алдахгүй байж чадна… гэдгийг хүүхдийн ой тойнд ортол нь хэлж ярьж төлөвшүүлэх нь маш чухал юм.
Хүүхдийн сэтгэл цэвэрхэн цаас шиг цагаахан байдаг нь үнэн бөгөөд тэнд юу бичигдсэн нь насан туршид нь үл арилдгийг эцэг эхчүүд нь мартаж үл болно.
