Хүүхдийн усанд ордог сав, сойз, алчуур, саван бүгд тусдаа байна. Хүүхдийн хувцсыг нийтийн саванд угаахгүй. Тусад нь өөрийнх нь түмпэнд угаана. Хүүхдийг өдөр бүр угаагаад байвал уснаас айхгүй, эвгүйцэхгүй болдог. Хүүхдийн арьсыг өдөр бүр угаадаг бол нурах гэдэг аюул тулгардаггүй.
Хүүхдийг хуурайлах бүрийн дараа бөгсийг нь заавал угааж бай. Охидын хярзан, бэлэг эрхтэнг урдаас нь хошного руу чиглүүлэн угааж, дараа нь цэвэр хуурай алчуураар дарж хатаана.
Хүүхдээ нүцгэлэхийн өмнө салхивчаа хаана, эх гараа савандан угааж цэвэр хормогч зүүнэ. Усанд ороход болон уснаас гараад өлгийдөхөд шаардлагатай зүйлийг ширээн дээр бэлтгэж тавина. Хүүхдийн усанд орж буй өрөөний дулаан 22-24 С байна. Хүүхдийг тусгай паалантай буюу хуванцар саванд усанд оруулна.
Усны дулааныг тохируулах
Нярай хүүхдэд буцалсан ус хэрэглэнэ. Эхний саруудад усны дулаан 37С, 6 сараас дээш насанд 36С байна.
Оруулж байгаа ус хүүхдийн биеийг бүрэн булхаж далдлах ёстой. Нярай хүүхдийн биеэр тууралт гарвал сулхан марганцтай (бүдэг ягаан) усанд оруулна. Марганцыг сайн хутгаж бүрэн ууссаны дараа хүүхдээ оруулна.
Усанд байх хугацаа
1 хүртэлх насны хүүхдэд 5-7 минут, 2 насанд 8-10 минут, 2-оос дээш насанд 10-20 минут байлгана.
Усанд орох тоо
Төрөхөөс гарснаас хойш өдөр бүр, 6 сараас дээш 1 өнжөөд, 1-3 насанд долоо хоногт 2-3 удаа, 4-5 наснаас долоо хоногт 1 удаа усанд оруулж болно.
Уснаас гаргах
Усанд оруулаад гаргахдаа 1-2 хэмээр хүйтэн усыг домбо, хувингаар хүүхдийн дээрээс нь гоожуулж дараа нь хуурай алчуураар зөөлөн арчина.
Хүүхдийн өрөө
Хүүхэд амьдарч байгаа өрөөг тогтмол агааржуулах, хүйтний улиралд 3-4 цаг тутам 10-15 минут, зун салхивчийг өдөржин нээлттэй байлгавал сайн. Өрөөний агаарын дулаан 1 сар хүртэлх хүүхдэд 22С, 2-3 сараас 20-21С, 3 сараас дээш насанд 18-19С байвал зохино. Хүүхэд байдаг өрөөнд угаалга хийх, хоол бэлдэх, тамхи татахыг цээрлэ. Тамхины утааны никотин хор, хүүхдийн амьсгалаар уушгинд орж хортой нөлөө үзүүлдэг.